Тимур Турлов БҰҰ Жаһандық келісімінің Орталық Азиядағы Консультативтік комитетінің төрағасы болды

Freedom Holding Corp. компаниясының бас атқарушы директоры Тимур Турлов трансшекаралық мәселелерді тиімді шешуге бағытталған БҰҰ Жаһандық келісімінің Орталық Азиядағы Консультативтік комитетінің төрағасы қызметіне кірісті. Бұл мәселелерге су ресурстары, экология, аштық пен кедейлік, инфрақұрылым, энергетикалық және азық-түлік қауіпсіздігі жатады.
Бұл туралы Алматыда өткен комитет отырысында жарияланды.

БҰҰ Жаһандық келісімі — 2000 жылы Біріккен Ұлттар Ұйымы ұсынған ерікті бастама, оның мақсаты — әлемдегі кәсіпорындар мен ұйымдарды тұрақты және әлеуметтік жауапты саясат пен тәжірибені қабылдауға ынталандыру. Жаһандық келісім он жалпыға танылған қағидатқа негізделген, олар төрт негізгі саланы қамтиды: адам құқықтары, еңбек, қоршаған орта және сыбайлас жемқорлыққа қарсы күрес.

2023 жылы Freedom Holding Corp. БҰҰ Жаһандық келісімінің қатысушысы болып, оның он қағидатын жүзеге асыруға міндеттеме алды және Консультативтік комитетке тұрақты мүше ретінде қосылды. Өткен жылдың тамызында холдингтің қайырымдылық және демеушілік қызметін орталықтандырылған түрде жүзеге асыратын арнайы корпоративтік «Freedom Шапағат» қоры құрылды. Соңғы алты айда қор осы мақсаттарға 5 млрд теңгеден астам қаражат бөлді. Бұдан бөлек, холдингте ESG қағидаттарын корпоративтік ортаға интеграциялау арқылы тұрақты даму саласында өңірлік көшбасшылық эталонына айналуға бағытталған ауқымды ішкі ESG-трансформация бастамасы қолға алынды.