50 млн клиент: Freedom Holding компаниясының Еуропада бизнесті дамыту жоспары

Freedom Holding Corp. компаниясы Францияда банктік лицензия алуға өтініш беріп, елде цифрлық банк құруға және цифрлық инфрақұрылымды дамытуға 500 миллион еуро инвестиция салуға дайын. Компания Францияны Еуропадағы негізгі өсім нарығы ретінде қарастырады және лицензияны бүкіл Еуропалық Одақ нарығында өз қаржылық экожүйесін кеңейту үшін пайдалануды жоспарлайды.

Франция Freedom экожүйесі үшін Еуропа нарығында әрі қарай дамудың маңызды элементіне айналуы мүмкін. Банктік лицензия компанияға қаржылық сервистер экожүйесін кеңейтуге және Еуропа одағы елдерінде бизнесті жедел дамытуға мүмкіндік береді. Холдингтің негізін қалаушы әрі басшысы Тимур Турлов холдингтің Еуропада банк бизнесін ашу мүмкіндіктерін бұрыннан зерттеп келгенін, алайда басқа елдер қызығушылыққа «ресми түрде» ғана жауап бергенін, ал Франция «айқын ынта білдіргенін» атап өтті.

«Қазақстанда біз халықтың шамамен жартысына түрлі қызметтер ұсынамыз. Біздің дамуға көмектескен технологиялар Еуропада да осындай нәтижелер береді деп есептейміз», — деп атап өтті Турлов.

Францияда банктік лицензия алу Freedom үшін стратегиялық маңызға ие, өйткені француз банк реттеушісі ACPR Еуропалық орталық банкімен бірлесіп жұмыс істейді, ал бұл лицензия іс жүзінде бүкіл Еуроодақ аумағында қызмет көрсетуге мүмкіндік береді. Алдағы үш жылда компания 50 млн‑ға дейін әлеуетті клиент тартуды және дамытуға €500 млн инвестиция салуды жоспарлап отыр.

Қазақстандық брокер Еуропада

Freedom Holding Corp. еуропалық нарықта Freedom 24 платформасы және кипрлік реттеушіден лицензиясы бар, бүкіл Еуроодақ бойынша клиенттерге қызмет көрсететін Freedom Europe еншілес брокерлік компаниясы арқылы жұмыс істейді.

Freedom24 акциялар, ETF, облигациялар, опциондар мен фьючерстерді қоса алғанда, инвестициялық құралдардың кең ауқымына қолжетімділікті ұсынады. Клиенттерге АҚШ, Еуропа және Азияның ірі қор нарықтары қолжетімді.

2025 жылдың соңындағы жағдай бойынша Freedom24-тің белсенді клиенттерінің саны 440 мыңнан асты, ал клиенттік активтердің көлемі $11 млрд-қа жетті. Компания Еуропаның тоғыз елінде кеңсе желісіне ие және құрлықтағы қатысу аясын кеңейтуді жалғастырып келеді.

Бұған дейін Freedom Europe атқарушы директоры Евгений Тяпкин Еуропадағы бизнес дамуының келесі кезеңі тек брокерлік қызметтермен ғана шектелмейтінін атап өткен еді.

«Біз классикалық брокер аясынан шыққымыз келеді. Еуропадағы өсімнің келесі кезеңі — оның айналасындағы бүкіл клиенттік экожүйені кеңейту. Бұл тұрғыда сөз ең алдымен банктік сервистер туралы болып отыр», — деген еді ол.

Пайданың өсуі

Еуропалық бөлім топтың ең табысты активтерінің бірі болып қала береді: 2025 жылдың қорытындысы бойынша Freedom Finance Europe-тың таза комиссиялық табысы екі жыл бұрынғы $190 млн-мен салыстырғанда $369 млн-ға дейін өсті.

Сол кезеңдегі салық салынғанға дейінгі пайда $139 млн-нан $284 млн-ға дейін артты. Таза пайда $253 млн-ға жетті. Осылайша, екі жыл ішінде еуропалық бизнестің табысы екі еседен астам өсті. Мұндай жоғары өсім қарқынын холдинг еуропалық кеңселердің клиенттер санын арттыруымен және өнім желісін кеңейтумен түсіндіреді. Сонымен қатар, бөлімше еуропалық инвесторлардың инвестициялық белсенділігінің артқанын байқап отыр.

Түркиядағы экспансия

2025 жылы Freedom Freedom Yatırım брокерлік компаниясын іске қосуға лицензия алды. Кейін холдинг Turkish Bank A.Ş. акцияларының 99,32%-ын сатып алу туралы келісімге қол қойды. Мәміле аяқталғаннан кейін компания халқы шамамен 90 млн адамды құрайтын нарықта толыққанды банктік платформаға ие болады.

Тимур Турлов бұған дейін Freedom түрік банктік және брокерлік бизнесін дамытуға шамамен $300 млн инвестиция салуды жоспарлап отырғанын мәлімдеген еді.

Компания Қазақстанда тиімділігін дәлелдеген модельді Түркияда қайталауды жоспарлап отыр. Алдымен брокерлік бизнес дамытылады, кейін банктік инфрақұрылым құрылады, одан соң инвестициялық, төлем және lifestyle-сервистерді біріктіретін бірыңғай цифрлық экожүйе мен SuperApp қосымшасы іске қосылады.

Тәжікстан тәжірибесі

2024 жылдың қазан айында Freedom Bank Тәжікстанда банктік лицензия алып, толықтай цифрлық банкті дамытуға кірісті. Бүгінгі күні Freedom банктің клиенттері Freedom SuperApp арқылы бірыңғай ұлттық QR-кодты пайдаланып, Тәжікстандағы 31 мыңнан астам сауда нүктесінде тауарлар мен қызметтерді төлей алады.

Холдинг басшылығы бірнеше рет Тәжікстандағы жобаны қазақстандық модельді жаңа нарыққа көшірудің табысты мысалы деп атаған. Компания жергілікті клиенттерге төлем сервистерін, банк карталарын және цифрлық қаржы өнімдерін ұсынып отыр.

Жылдық нәтижелер

2026 жылғы 31 наурызда аяқталған қаржы жылының қорытындысы бойынша Freedom Holding-тің табысы өткен жылғы $2,04 млрд-тан $2,19 млрд-қа жетті. Салық салынғанға дейінгі пайда $226 млн-ды құрады, ал таза пайда екі еседен астам өсіп, $153,3 млн-ға жетті. Бір акцияға шаққандағы пайда $2,56 болды.

Холдингтің активтері $13,2 млрд-қа дейін ұлғайды, ал ақша қаражаттары, инвестициялық қағаздар және басқа да өтімді активтердің көлемі $5,5 млрд-қа жетті. Акционерлердің меншікті капиталы $1,5 млрд-қа дейін өсті. Операциялық қызметтен түскен таза ақша ағыны $185,2 млн-ды құрады.

Өсімнің негізгі драйверлерінің бірі сауда бағалы қағаздарымен жасалған операциялардан алынған оң нәтиже болды. Жыл қорытындысы бойынша компания $158,8 млн пайда тапты, ал бір жыл бұрын $57,8 млн шығын болған еді. Қосымша үлесті телекоммуникациялық бизнес, бұлтты сервистер және экожүйе ішіндегі электрондық коммерцияның дамуы қосты.

Клиенттік база да өсуін жалғастырды. Брокерлік шоттар саны 858 мыңға жетті, банктік клиенттер саны 5 млн-ға дейін артты, ал Freedom SuperApp аудиториясы 5,2 млн пайдаланушыдан асты. Топ компанияларының жалпы клиенттер саны 8,1 млн адамға жетті. Серіктес сервистердің пайдаланушыларын есептегенде, экожүйе аудиториясы 14 млн адамнан асады.

Жыл қорытындысына пікір білдірген Freedom Holding Corp. басшысы компания жаңа бизнес бағыттарын, цифрлық инфрақұрылымды дамытуға және халықаралық экспансияға ауқымды инвестициялар жасағанына қарамастан, жоғары өсу қарқынын сақтап отырғанын атап өтті.