Тимур Турлов: Freedom клиенттердің күнделікті қажеттіліктеріне арналған ЖИ-көмекшіні әзірлеуде

AI & Digital Bridge форумында Тимур Турлов сервистермен өзара әрекеттесудің жаңа тәсілін ұсынды. Оның айтуынша, цифрлық экожүйе клиентіне қосымшаның әр бөлімін жеке меңгерудің қажеті жоқ, қажетті нәтижені айтса болғаны.

Қазір Freedom Holding Corp. төлем жасау, инвестициялау, сақтандыру рәсімдеу және саяхат қызметтерін пайдалану процесін жеңілдететін жеке ЖИ-агентті әзірлеп жатыр. Бұл көмекші клиенттің сұранысын түсініп, қажетті қызметтерді өзара байланыстырып, тапсырмаларды орындауға көмектеседі.

Freedom Holding Corp. 2026 жылдың соңына дейін SuperApp қосымшасында жеке ЖИ-көмекшінің алғашқы кезеңін іске қосуды жоспарлап отыр. Экожүйенің бұл бағыттағы жоспарлары туралы оның негізін қалаушы әрі CEO-сы Тимур Турлов Астанада өткен AI & Digital Bridge технофорумындағы The New Economy: Powered by AI сессиясында айтты. Жаңа сервис пайдаланушыларға қаржы, сатып алу және саяхатқа қатысты міндеттерді қарапайым тілдегі сұраныстар арқылы басқаруға мүмкіндік береді.

«Қосымшаның әр функциясы қалай жұмыс істейтінін жаттап жүрудің қажеті болмайды. Қарапайым тілмен өзіңізге не қажет екенін айтсаңыз жеткілікті», – деп түсіндірді Тимур Турлов.

Сессияға қатысушылар жалпы жасанды интеллектіні технологиялық эксперименттен бизнес пен күнделікті өмірге арналған құралға қалай айналдыруға болатынын талқылады. Пікірталас практикалық мәселелерге арналды: жасанды интеллект компаниялардың жұмысына қандай өзгеріс енгізіп жатыр, оның қабылдайтын шешімдері үшін кім жауап береді және жаңа дәуір экономикасына қандай инфрақұрылым қажет.

Іздеудің орнына тапсырманы сипаттау

Қазір Freedom Holding Corp. клиенттерге экожүйе сервистерін пайдалануды жеңілдету үшін SuperApp қосымшасына жасанды интеллектіні енгізу бағытында жұмыс істеп жатыр. Қосымша холдингтің көптеген қызметтерін бір платформаға біріктіреді: төлемдер, жинақтар, инвестициялар, сақтандыру, азық-түлік сатып алу және саяхат ұйымдастыру. Тимур Турловтың айтуынша, жеке ЖИ-агент клиенттердің қосымшаның әртүрлі бөлімдерімен жұмысын барынша жеңілдетуі тиіс. Әзірлеушілердің тұжырымдамасы бойынша, пайдаланушы әр қызметті түрлі бөлімдерден іздеп отырмай, ЖИ-агентке қандай нәтиже қажет екенін жай ғана түсіндіре алады.

Мысалы, жасанды интеллектіден сапар ұйымдастыруды сұрауға болады: қонақүй таңдау, бронь рәсімдеу және виза алуға көмектесу. Егер жоспар өзгерсе, көмекші броньды болдырмауға немесе билетті ауыстыруға жәрдем беруі тиіс.

«Жүйе елдегі әрбір тұрғын үшін жоғары білікті жеке көмекші сияқты жұмыс істеуі тиіс», – деп атап өтті холдинг басшысы.

Сонымен қатар сенімді әрі тұрақты жұмыс істейтін өнімді жасау демонстрациялық нұсқаны әзірлеуге қарағанда әлдеқайда көп уақытты талап етеді. Тимур Турловтың айтуынша, жекелеген жүйені кейде бір күннің ішінде құрастыруға болады, алайда оны толық жетілдіру үшін жылдар қажет. Холдинг жаңа өнімді тестілеудің алғашқы кезеңін 2026 жылдың өзінде өткізе алады деп жоспарлап отыр.

Жасанды интеллект басқару тәсілін өзгертеді

Тимур Турловтың пікірінше, жасанды интеллект тек жекелеген қызметтерді автоматтандырып қана қоймай, компанияларды басқару тәсілін де түбегейлі өзгертуі мүмкін. Оның айтуынша, ЖИ шешім қабылдау жылдамдығын арттырып, деректерді талдауды тиімдірек етеді әрі күнделікті операциялық міндеттердің елеулі бөлігін өз мойнына алады.

Freedom Holding Corp. ішінде жасанды интеллект қазірдің өзінде жұмыс үдерістерін жеделдетуге, білім қорлары мен статистикаға қол жеткізуге, сондай-ақ есептіліктің сапасын арттыруға көмектесіп келеді. Тимур Турловтың айтуынша, ол ЖИ-ді басшы ретінде өзінің жұмысында да пайдаланады: нейрожеліні негізгі деректер базаларына қосу арқылы CEO компанияның қызметі, рәсімдері мен бизнес-процестердің тиімділігі туралы сұрақтар қойып, оларға жедел жауап ала алады.

Алайда The New Economy: Powered by AI сессиясының спикерлері жекелеген қызметкерлердің мүмкіндіктерін кеңейту ұйымның өзінің де өзгеруімен қатар жүруі тиіс деген пікір білдірді. 01.AI компаниясының негізін қалаушы және Sinovation Ventures венчурлік инвестициялық қорының төрағасы Кай-Фу Ли басшыларға жасанды интеллектіні енгізудің тиімділігін оның компанияның түпкі қаржылық нәтижесіне әсері арқылы бағалауды ұсынды. Оның айтуынша, бұл технология кәсіпкерлерге шағын командамен бизнес жүргізуге және оны әлдеқайда жылдам ауқымдауға мүмкіндік береді.

Оның тағы бір маңызды ұстанымы – нәтиже үшін нақты жауапты адамды белгілеу қажеттігі. Мысалы, белгілі бір қызметкер жасанды интеллектінің жұмысын қадағалап, оның қорытындыларын тексеріп, жүйенің мүмкіндіктері мен шектеулерін жақсы түсінуі тиіс. Sinovation Ventures басшысының пікірінше, алгоритмдерге түрлі міндеттерді сеніп тапсыруға болады, алайда қателік, қаржылық шығын немесе заң бұзушылық үшін жауапкершілікті жасанды интеллектінің өзіне жүктеуге болмайды.

«Қазақтелеком» басқарма төрағасы Бағдат Мусиннің айтуынша, өнімді қызметкерлердің болуы компанияның өзін автоматты түрде өнімді ете алмайды. Мысалы, жасанды интеллект көмегімен бірнеше минутта дайындалған идея кейін бірнеше апта бойы келісу кезеңдерінен өтетін болса, технологияның тиімділігі жоғалады. Сондықтан бизнес-процестерді қайта қарау жаңа құралдарды енгізумен қатар жүруі тиіс.

Жасанды интеллект қаржы саласында

Kraken криптобиржасының басшысы Дэвид Рипли қаржы секторында жасанды интеллектіні қолданудың үш негізгі бағытын атады: ішкі бизнес-процестерді қайта құру, клиенттік өнімдерге ЖИ-көмекшілерді енгізу және жасанды интеллект агенттері арасындағы төлемдер жүйесін дамыту.

Оның айтуынша, қазірдің өзінде бұл технология бағдарламалық өнімдерді әзірлеудің тиімділігін арттырып, комплаенс талаптарын орындауды жеңілдетуге және клиенттерге қолдау көрсету сапасын жақсартуға көмектесіп отыр. Келесі кезеңде қажетті ресурстар үшін өздігінен төлем жасап, көрсетілген қызметтері үшін төлем қабылдай алатын агенттер пайда болады. Риплидің болжамынша, алдағы бес-он жылда мұндай агенттердің үлесіне төлем ағындарының елеулі бөлігі тиесілі болады.

Қазақстанға қосымшалар ғана емес, есептеу қуаты да қажет

Премьер-министрдің орынбасары, жасанды интеллект және цифрлық даму министрі Жаслан Мәдиев жасанды интеллект экономикасының бес деңгейін сипаттады: энергетика, чиптер, бұлтты платформалар, тілдік модельдер және қолданбалы шешімдер. Оның айтуынша, Қазақстан басқа елдермен және технологиялық компаниялармен ынтымақтаса отырып, осы тізбектің барлық буыны бойынша құзыреттерді дамытуға ниетті. Жаслан Мәдиевтің пікірінше, ең үлкен практикалық тиімділікті қолданбалы деңгей бере алады, яғни экономиканың түрлі салалары мен азаматтардың күнделікті қажеттіліктеріне арналған шешімдер.

Тимур Турлов мұндай сервистерді дамыту Freedom Holding Corp.-тың телекоммуникацияларға, бұлтты есептеулерге және деректерді өңдеу орталықтарына бағытталған инвестицияларымен тығыз байланысты екенін атап өтті. Оның айтуынша, холдинг халықаралық байланыс инфрақұрылымын құрып жатыр, әрі өңірді қосымша есептеу қуатымен қамтамасыз етуге тиіс жасанды интеллектке арналған суперкластерді дайындауда.

Қазақстанның артықшылықтары ретінде Тимур Турлов жас халықтың көптігін, технологияларға деген жоғары қызығушылықты, адами капиталдың әлеуетін және қарқынды дамып келе жатқан кәсіпкерлік ортаны атады. Оның пікірінше, алдағы уақытта дамуды жалғастыру үшін халықаралық серіктестердің сенімін сақтап, олардың тәжірибесі мен құзыреттеріне қолжетімділікті қамтамасыз ету маңызды.

Ал жасанды интеллект қауіпсіздігі мәселесіне тоқталған Жаслан Мәдиев жаңа модельдерді тексеру хаттамаларын әзірлеу ісіне мемлекет пен әзірлеушілер бірлесіп қатысуы қажет екенін айтты. Тимур Турлов өз кезегінде технологиялық компаниялардың жаһандық ынтымақтастығы идеясын қолдап, бұл жұмысқа Қазақстанды қоса алғанда, түрлі елдердің өкілдері атсалысуы тиіс екенін атап өтті.

Қазақстандағы жасанды интеллект жылы

2026 жыл Қазақстанда Цифрландыру және жасанды интеллект жылы болып жарияланды. Президент Қасым-Жомарт Тоқаев қол жеткізілген технологиялық прогресс азаматтар үшін нақты әрі сезілетін нәтижелерге айналуы тиіс екенін атап өтті. Сонымен қатар ол экономиканың нақты сұраныстарына негізделген өндірістік ЖИ-міндеттерінің тізімін қалыптастырып, оларды шешуге мамандар командаларын тартуды ұсынды.

Freedom Holding Corp. бұл қағидаттарды нақты жобалар арқылы жүзеге асырып келеді. Холдинг Жасанды интеллект және цифрлық даму министрлігімен бірлесіп, Nvidia инфрақұрылымы негізінде егеменді ЖИ-хаб құруды жоспарлап отыр. Жобаға шамамен $2 млрд доллар инвестиция салу көзделген, ал алаңның қолжетімді энергетикалық қуаты 100 МВт болады. Freedom бұл бастаманың негізгі инвесторы әрі операторы болуды жоспарлап отыр.

Сонымен қатар экожүйе, министрлік және Citi Freedom AI Super Cluster жобасын құру туралы меморандумға қол қойды. Жарияланған жоспарға сәйкес, жобаның алғашқы кезеңі 2027 жылдың І тоқсанында іске асырылуы тиіс. Ал келесі екі кезеңін 2027-2028 жылдары жүзеге асыру көзделген.

Білім беру саласында холдинг OpenAI және Қазақстан Үкіметімен бірлескен бастаманы қаржыландырып отыр. Бұл жоба аясында 165 мың педагогқа ChatGPT Edu платформасын пайдалану мүмкіндігі беріледі. Платформа құралдары оқу материалдарымен жұмыс істеуге, құжаттарды талдауға және жеке ЖИ-көмекшілерді құруға арналған.

Ал банк секторындағы практикалық қолданудың бір мысалы ретінде Freedom Bank технологиялары мен Қаржылық мониторинг агенттігінің әдіснамасын біріктіретін AI-Compliance платформасын атауға болады. Ол қылмыстық жолмен алынған қаражатты шығаруға өз банк карталарын ұсынып жүретін дроптар желісін анықтауға және күмәнді операциялар бойынша материалдар дайындауға көмектеседі. Алайда түпкілікті шешімді комплаенс-офицер қабылдайды.